Back to Top
ხუთშაბათი, 06 დეკემბერი 2018 13:18

მოსწავლე მასწავლებელს შეურაცხყოფაში ადანაშაულებს - საკითხს დისციპლინური კომიტეტი სწავლობს

Rate this item
(0 votes)

გორის #12 საჯარო სკოლის მოსწავლე ამბობს, რომ მასწავლებელმა კლასელების თანდასწრებით სიტყვიერი შეურაცხყოფა მიაყენა.

შემთხვევა 4 დეკემბერს მოხდა. არსებული ინფორმაციით, იმ დღეს სკოლის დირექტორი სკოლაში არ იმყოფებოდა, რადგან დირექტორებისა და მასწავლებლების შეხვედრას ესწრებოდა. შესაბამისად, რუსუდან ლომიძემ ფაქტის შესახებ 6 დეკემბერს შეიტყო. 

"არ ვიყავი სამსახურში, შეხვედრაზე ვიყავი. შესაბამისად, გუშინ გავიგე, რომ მოსწავლე მეძებდა და ამბობდა, რომ მასწავლებელმა შეურაცხყოფა მიაყენა, თუმცა ამას არც თავად მასწავლებელი და არც მისი თანაკლასელები არ ადასტურებენ. ზოგადად, ემოციური ბავშვია და შეიძლება, ამიტომ აღიქვა ასე მძაფრად", - ამბობს დირექტორი რუსუდან ლომიძე. 

მისივე ინფორმაციით, მან საკითხი შესასწავლად დისციპლინურ კომიტეტს გადასცა. 

"დისციპლინური კომიტეტი მოიკვლევს საკითხს და ვნახოთ, რას გამოავლენს. ვიცი, რომ მოსწავლის ოჯახიც საქმის კურსშია, რადგან ჩვენმა მანდატურმა თქვა, რომ მის დედას იცნობს და დელაპარაკებოდა", - თქვა ლომიძემ. 

შემთხვევის შესახებ ინფორმაცია აქვს გორის რესურსცენტრის ხელმძღვანელ ნანა ტერმაკოზაშვილსაც. 

"გავიგე თუ არა ეს ამბავი, მაშინვე ვიკითხე, დისციპლინურ კომიტეტს გადასცეს თუ არა-მეთქი და მითხრეს, რომ უკვე ეს კომიტეტი სწავლობს ამ საქმეს", - გვითხრა ტერმაკოზაშვილმა. 

Read 1895 times Last modified on ხუთშაბათი, 06 დეკემბერი 2018 13:54