Back to Top
 

JPrize Web Geo

პარასკევი, 07 ივნისი 2019 11:02

"დილით ოკუპირებული და საღამოს გათავისუფლებული ნაკვეთი" - მოქალაქემ საჯარო რეესტრს დავა მოუგო

Rate this item
(0 votes)

თბილისის სააპელაციო სასამართლომ არ დააკმაყოფილა საჯარო რეესტრის საჩივარი და სოფელ დიცში, უწყებას გამყოფ ხაზთან მდებარე მიწის ნაკვეთის რეგისტრაცია დაავალა. დიცის მკვიდრი ილია ბერუაშვილი მის საკუთრებაში არსებული მიწის ნაკვეთის რეგისტრაციას წლებია ითხოვს.

გორის მუნიციპალიტეტის სოფელ დიცის მკვიდრმა, ილია ბერუაშვილმა საჯარო რეესტრს 1 ჰექტარი მიწის ფართის რეგისტრაციის მოთხოვნით რამდენიმე წლის წინ მიმართა. საჯარო რეესტრში მიიჩნიეს, რომ მიწის ნაკვეთი, რომლის რეგისტრაციასაც ბერუაშვილი ითხოვდა, ოკუპირებული იყო და შესაბამისად, უარი უთხრეს.

საჯარო რეესტრის გადაწყვეტილება ბერუაშვილმა სასამართლოში გაასაჩივრა. გორის რაიონულმა სასამართლომ საჯარო რეესტრის არგუმენტები უსაფუძვლოდ მიიჩნია და უწყებას ნაკვეთის რეგისტრაცია დაავალა.

დავა კიდევ ერთ ინსტანციაში გაგრძელდა. გორის რაიონული სასამართლოს გადაწყვეტილება საჯარო რეესტრმა სააპელაციოში გაასაჩივრა.

სააპელაციო სასამართლომ არ მიიღო მხედველობაში იუსტიციის სამინისტროს საჯარო რეესტრის არგუმენტები. 

"ოკუპანტებისთვის გამოგლეჯილი მიწის ნაკვეთი არ მიიჩნია სასამართლომ ოკუპირებულად. არ ყოფილა შეუძლებელი "დილით ოკუპირებულ და საღამოს გათავისუფლებულ" (რეესტრის არგუმენტი იყო ერთ-ერთი) ტერიტორიაზე საქართველოს იურისდიქციის გავრცელება/აღდგენა. ყოველ განთავისუფლებულ კვადრატულ მეტრზე, ყოველწამიერად უნდა ვიყოთ მზად აღვადგინოთ და გავავრცელოთ ჩვენი ქვეყნის სუვერენიტეტი", - ამბობს ადამიანის უფლებათა დაცვის ცენტრის იურისტი ლექსო მერებაშვილი, რომელიც სასამართლოში ილია ბერუაშვილის ინტერესებს იცავს.

Read 1032 times Last modified on პარასკევი, 07 ივნისი 2019 11:07